Aragon eta Arga ibaien beheko tarteak

Informazioa/Mapa

Aragon eta Arga ibaien beheko tarteak

Informazioa
Mapa ikusi
Natura Sarea:

Kontserbazio Bereziko Eremua (KBE)

Udalerriak:

Caparroso, Zarrakaztelu, Faltzes, Funes, Martzilla, Melida, Milagro, Murillo el Cuende, Murillo el Fruto, Azkoien, Santakara eta Alesbes

Azalera (Ha):

2.447,85

Altitudea (m):

256 - 421

Bioeskualdea EB:

Mediterraneoa

Izendapen-data:

2017ko apirila

Naturguneak babesteko beste figura batzuk:

Sotos del Arquillo eta Barbaraces natura-erreserba (RN-28); Sotos de la Lobera eta Sotillo natura-erreserba (RN-29); Sotos de Gil eta Ramal Hondo natura-erreserba (RN-30); Soto López lekune naturala (EN-6); Soto de la Recueja  lekune naturala(EN-7); Soto de Campo Llano  lekune naturala(EN-14); Soto de La Biona  lekune naturala(EN-15); Soto de Escueral  lekune naturala(EN-16); Soto Sequero  lekune naturala(EN-17); Soto Ártica  lekune naturala(EN-18); Soto Arenales  lekune naturala(EN-19); Soto Valporres-Soto Bajo  lekune naturala(EN-20); Sotos de Rada lekune naturala(EN-21); Sotos de la Muga  lekune naturala (EN-22); Soto Santa Eulalia lekune naturala (EN-23)

Aragon eta Arga ibaien beheko tarteak

Ibaiak, bizibide

Nafarroako hegoaldean, Arga eta Aragoi ibaien akaberako tarteak egiazko korridore ekologikoak dira landare, hegazti, arrain, narrasti eta ugaztunentzat. Era askotako ingurunez osaturiko pasabideak dira, bizibideak, eta horri esker, animaliak ibaietan gora eta behera ibiltzen dira habitata galtzeko beldurrik gabe. Haien artean, bisoi europarra dago, hau da, galtzeko arriskurik handienetakoa duen ugaztun-espezieetako bat mundu osoan. Leku honetan finkatu da, arras egokia baita berarentzat.

Aragoi ibaia Villafrancan Eduardo Blanco Mendizábal

Azkeneko tartean, Arga eta Aragoi ibaiek sigi-saga egiten dute aurrera, bihurgunez beteriko errepideak bailitzan. Bi ibaiei esker, ibaiertzeko herriak bizitzaz beterik daude. Argak Faltzes, Azkoien eta Funes bustitzen ditu. Aragoik, Zarrakaztelutik Milagrora bitarteko udalerriak, harik eta urak Ebrora isurtzen dituen arte. Meandro aunitz marraztu dituzte, haietako batzuk uholde-lautaden gainean abandonatuak gelditu direnak. Ibilbide horiek oso oparoak dira ibai-habitatetan eta, horren ondorioz, bizi-baldintza ezin hobeak sortu dira ibaietako flora eta faunarentzat.

Ekosistema urtar eta lurtar batzuk arras ongi kontserbaturik daude. Horrez gain, erreka eta erreten sare handiari esker, ibai-espazioetan bizi diren animaliak eta landareak ederki finkatzen dira eta biziraupena bermatua dute. Bisoi europarra, adibidez, galzorian dago, baina lekuotan bizileku aproposa aurkitu du, ibaietako basoak eta hezeguneak behar baititu bere bizi-zikloaren hainbat etapatan. Hudoaren tamainako animalia txikia da, marroia, txokolate-kolorekoa, baina bi orban zuri txiki ditu: bata, goiko ezpainean; bestea, behekoan. Besteak beste, lursaguak, karramarroak, arrainak eta anfibioak jaten ditu. Inguru honetan, Nafarroako desman europar guztien % 20 bizi da, eta Iberiar penintsulako populazioaren bi heren.

Bisoi europarra ez ezik, beste espezie garrantzitsu batzuk ere bizi dira Arga eta Aragoi ibaien beheko tarteetan, hala nola igaraba eta apoarmatu istilzalea. Arrainetan, loina, errutiloa eta mazkar arantzaduna; eta bertako bibalbioak, hala nola ibaiko muskuilua. Hegazti urtar asko ere etortzen dira ibai-tarte hauetara, ur garbien arrimura; besteak beste, zikoina zuriak, koartza hauskarak, txilinportak, amiltxoriak eta ibarbasoei lotutako harrapariak, hala nola miru beltza eta miru gorria. Ibai gaineko labarretan, harkaiztietako hegazti mehatxatu zenbaitek egiten dituzte habiak; sai zuriek, arrano beltzek, hontz handiek eta belatxinga mokogorriek, adibidez.

Ibaiertzak eta ibai-bazterrak, gozagarri

Bi ibai-bazterretan eta ertzetan, zurzuri-basoak dira bereizgarriak, baina sahatsak, zugarrak eta milazkak ere hazten dira. Aragoi ibaiaren labarretan, Caparroso parean, eta Argaren eta Aragoiren arteko elkargunetik behera, berriz ere arteak ageri dira. Ibaiko berezko landaretzaz gain, alor ureztatuak eta makal-basoak ere badira.

Basahatea Lander Goñi Irigoyen
(Populus nigra) Makal beltza ibai bazterrean Eduardo Blanco Mendizábal

Baina ibaien inguruan dagoen natur inguruneak ez ditu soilik flora- eta fauna-espezie interesgarriak erakartzen. Azken urteotan, inguruko herrietako jende asko joaten da ibai-espazio horietara denbora pasa. Izan ere, bizilagun aunitz oinez edo BTT bizikletaz ibiltzen dira ibai-bazterretako bidexketan barna. Horrez gain, erabilera publikorako ekipamenduak moldatu dira LIFE programaren baitan, bisoi europarra kontserbatze aldera. Hona hemen: Faltzesko Sotobajo interpretazio eremua; Melidako begiratokiko interpretazio gunea; Martzillako “La Isla” gunea, bai aisiarako, bai ibai-espazioetako natur baliabideen balioa erakusteko; eta bisoiaren gaineko informazio gunea, Faltzesen, informazio emateko, jendearen partaidetza sustatzeko eta bizilagunak sentsibilizatzeko.

Argibideak

  • Prentsa-oharra, 2017-03-08: Ebro, Ega-Urederra eta Aragoi-Arga ibaietako tarte batzuk kontserbazio bereziko eremu izendatu dira.
Pontia daplidice Eduardo Blanco Mendizábal
Image
Uholdeak Eduardo Blanco Mendizábal
Image
Apoarmatu istilzalea Lander Goñi Irigoyen
Image